Planċier Artistiku tas-Soċjeta' Muż. Santa Katarina V.M.

Is-Soċjeta' Mużikali Santa Katarina V.M. fakret għeluq l-ewwel 50 sena (1956 - 2006) minn meta zzanzan il-Plancier Artistiku

Fis-sena 2006, is-Soċjetà Mużikali Santa Katarina V.M. fakkret għeluq il-Ħamsin sena minn meta ġie mzanzan il-Planċier Artistiku tal-Banda.

Fis-sena 1954 kien hawn entużjażmu kbir fost il-membri tas-Soċjetà Mużikali Santa Katarina V.M. sabiex isir il-planċier tal-banda. Fis-seduta tal-Kumitat ta’ l-24 ta’ Mejju 1954, is-sinjuri membri Nikola Bugeja, Giovanni Camilleri, Censu Caruana, Guzeppi Caruana, Alfons Gauci, Carmelo Grixti, Guzeppi Zammit u Pawlu Zammit, taħt il-Presidenza tas-Sur Carmelo Pace qablu unanimament li jagħtu bidu għal din l-opra. Filwaqt li l-Kumitat sejjaħ lill-Imgħallmin tas-Soċjetà biex jingħaqdu f’sotto kumitat, beda l-arbular mis-Sinjuri Nikola Bugeja u Censu Caruana. Wara diversi laqgħat saret sejħa għad-disinji u fost dawk sottomessi minn diversi mgħallmin, ġie magħzul dak tas-Sur Carmelo Vassallo tar-Rabat. Inbeda x-xogħol fil-każin mill-membri u ammiraturi tas-Soċjetà li ħadmu għall-ġranet u ljieli sabiex għaqqdu dan il-planċier hekk grandjuż.

Sabiex ħutna l-membri li ħadmu fuq dan il-proġett jibqgħu mfakkra ser insemmu l-ismijiet tagħhom skond is-sengħa partikolari tagħhom:

(i) Ħaddieda: Guzeppi u Salvu Camilleri, Angelo Sammut, Rosario Schembri u Ganni Zammit.

(ii) Mastrudaxxi: Sebasjan Bonnici, Nikola Bugeja, Guzeppi Farrugia, Rokku Grixti u Guzeppi Xuereb.
(iii) Funderiera: Mikiel Camilleri, Censu Farrugia, Ganni Mallia u Censu Schembri.
(iv) Skulturi: Salvu Bugeja u Emmanuel Mallia.
(v) Dekoraturi: Carmelo Grixti u Mosè Mifsud.
(vi) Induraturi: Guzeppi Farrugia, Carmelo Grixti u Pawlu Xuereb.
(vii) Electricians: Censu Caruana u Guzeppi Caruana.

Barra minn dawn kien hemm oħrajn li għenu fix-xogħol li sar fuq il-planċier. Is-Sotto Kumitat maħtur mill-Kumitat, flimkien mas-Sur Emmanuel Gauci ġew inkarigati sabiex jorganizzaw il-festa ta’ l-inawgurazzjoni tal-planċier.

Nhar is-Sibt 25 ta’ Awissu 1956, il-Banda Santa Katarina V.M. żannet sett marċi brijużi minn Triq Irjali, illum Triq il-Kbira, sa Misraħ Churchill, illum Misraħ Repubblika. Il-Ħadd 26 ta’ Awissu 1956 ġiet imżanżna bandiera bl-emblema tas-Soċjetà Mużikali Santa Katarina V.M. fuq disinn tas-Sur Salvu Bugeja. L-ispejjeż ta’ din il-bandiera nġabru mis-Sinjuri Marjanu Fino u Carmelo Grixti. Għaċ-ċerimonja ta’ l-inawgurazzjoni ġew mistiedna diversi persuni distinti fosthom il-Gvernatur Sir Robert Laycock u Lady Laycock, l-Arċisqof Mons. Mikiel Gonzi, il-Prim Ministru Dom Mintoff, il-membri parlamentari tad-distrett, l-Arċipriet Dun Salv Gauci, il-membri tal-Kleru u dawk li ħadmu fil-planċier. Fil-preżenza ta’ folla kbira li mliet Misraħ Churchill, is-Segretarju s-Sur Censu Caruana għamel diskors ta’ l-okkazjoni, saret l-inawgurazzjoni mill-Gvernatur Sir Robert Laycock u ġie mbierek mill-Arċisqof Mons. Mikiel Gonzi.

F’din l-okkażjoni l-Banda Santa Katarina V.M. esegwiet programm vokali u strumentali taħt id-direzzjoni tas-Surmast Espedito Deguara A.(Mus.) L.C.M. Ħadu sehem is-Sopran Hilda Tabone, it-Tenur Anthony Cini, il-Baxx Piju Zammit, il-Kor tal-Hamrun u l-Kor tas-Soċjetà Mużikali Santa Katarina V.M. Dawn kienu l-kompożizzjonijiet mużikali li daqqet il-Banda Santa Katarina V.M. fl-inawgurazzjoni tal-Planċier.

Dan il-jum memorabbli għalaq bil-logħob tan-nar.

Wara l-programm mużikali sar riċeviment fis-sala tal-każin fejn l-Arċisqof Mons. Mikiel Gonzi rregala l-berittin u l-kallotta biex jibqghu tifkira ta’ din il-ġrajja storika.

Id-Disinjatur tal-Planċier Artistiku Mastru Carmelo Vassallo tar-Rabat.

Fil-karriera brillanti tiegħu, is-Sur Carmelo Vassallo ħadem ħafna xogħlijiet fosthom: (i) Disinn u xogħol tas-suffett tas-sala prinċipali tal-Każin tal-Banda Konti Ruggieru tar-Rabat; (ii) Disinn totali tal-planċier tal-Banda Konti Ruggieru u kien wieħed mill-imgħallmin li ħadmu fl-istess planċer; (iii) Disinn u xogħol ta’ żewg gwarniċi tal-fidda maħduma “a martello” ta’ żewg kwadri tal-Madonna tal-Bon Kunsill u tal-Qalb ta’ Gesù li jinsabu fil-kappella ta’ l-istess każin. (iiii) Disinn għall-arkivju tal-mużika li ġie magħżul wara kompetizzjoni u li jinsab fl-istess Każin tar-Rabat. (v) Disinn ta’ antiporta tal-kewba għall-Każin tal-Banda Konti Ruggieru; (vi) Disinn tal-pilandri tad-dawl li jinsabu quddiem il-Knisja Parrokkjali Kolleġġjata ta’ San Pawl tar-Rabat u li jiġu mixgħula kuljum.

Ħajr lis-Sur Pawlu Cilia tar-Rabat għal din l-informazzjoni.