Lejla Maltija

 

Kien it-28 t’Awissu 1993 meta s-Sezzjoni Żgħażagħ Palmisti organizzat għall-ewwel darba fiż-Żurrieq, il-Lejla Maltija Grandjuza. Dak in-nhar fil-għodu kienet saret quddiesa għaż-żgħażagħ, saret parata mill-iscouts u sar it-tlugħ ta’ bandiera ġdida mal-arblu t-twil fid-daħla taż-Żurrieq. Filgħaxija kien hemm programm varjat fejn kien hemm mistiedna diversi kantanti Maltin, kif ukoll kien hemm varjeta’ ta’ ikel Malti. Il-Palk minn dejjem kien palk verament oriġinali u l-ewwel palk kien juri fuq naħa mitħna flimkien ma’ għodda użati mill-bdiewa Maltin, filwaqt illi fuq in-naħa l-oħra fuq l-isfond ta’ Blue Grotto kien hemm frejgatina bix-xbieki tas-sajjieda.

Din l-attivta’ stabiliet ruħha fil-Kalendarju sew tas-Sezzjoni Żgħażagħ kif ukoll tas-Soċjeta’ u din tiġi organizzata ta’ kull sena lejlet il-Ħrug min-Niċċa tal-Istatwa Titulari. Mill-1993 sal-lum ġew organizzati 17-il Lejla Maltija (l-unika darba li ma ġietx organizzata kien fl-1998 minħabba li l-Festa ġiet trasferita għal ftit ġimgħat qabel is-soltu minħabba l-Elezzjonijiet Ġenerali tal-Pajjiż). L-attrazzjonijiet prinċipali f’din l-attivita’ huma l-palk veru oriġinali li jsir kull sena kif ukoll il-varjeta’ kbira ta’ ikel. Ta’ min isemmi wkoll it-temi ta’ wħud mill-palkijiet li saru matul is-snin; Forti Santa Katarina, Taħt l-Imdina, il-gzejjer ta’ San Pawl, Bieb il-Bombi, Ħaġar Qim, il-Knisja Arċipretali ta’ Santa Katarina taż-Żurrieq u ħafna oħrajn.

  Palkijiet Lejla Maltija 

 Preparamenti u Divertiment tal-Lejla Maltija